|
Sommer 2010
 Leev Üle, leev Fründe d’r Jesellschaff, koot bevör de Sommerferie anfange un alles en Urlaub jeit, welle mer Üch noch et Aktuellste us dem Verein berichte. Am 23. 5. (Pingssonndach) han en Hääd Lück vör dem Jemeindehuus vun der Christuskirch zo Ihre vun unsem Vereinsdeener Fritz Esser (dä Stoppe) bei schönstem Wedder singe 75. Jebootsdach jefiert. Der Fritz mööt sich an dä Stell bei all dä Jäss un alle Fründe, die zum Jelinge vun dä schöne Fier beijedrage han, janz hätzlich bedanke. Am 25. Mai heeldt der UHU en un op de TV-Terrasse sing Johreshaup-versammlung av. Als Nohfoljer vun unsem Präsident Willi Hölzgen, dä noh der Session 2009/10 singe Röcktredd verkündt hatt, wood bei dem Anlass Rainer Ott als neuer Präsident der KG UHU vörjestallt. Mer wünsche dem Rainer vun dä Stell us Jlöck un vill, vill Spass en singem neue Amp. Der Willi Hölzgen wood för sing 40-jöhrije Präsidentschaff un sing Verdeenste öm de Jesellschaff zum Ihrepräsident ernannt. Thomas Forst, dä noh 11 Johr Vörstandsärbeid als Schatzmeister för de KG UHU sing Amp zur Verfüjung jestallt hät, wood zum Ihrerotshäär ernannt. Als Nohfoljer wood Dirk Königs vun der Versammlung einstemmig jewählt. Am 20. 6. hammer met üvver 150 UHU's, J'UHU's, Senatore un met Anhang en Scheffstour noh Unkel jemaht. Em Städtche hammer nevve nem Rundjang traditionsjemäß och em „Lämmlein“ Station jemaht. Noh der Röckfahrt noh Kölle sull dä ein ov andere noch beim Olli em Werk 1 jesinn woode sin. So, dat wor dat wat wor un jetz kütt dat wat kütt. Der Kaatevörverkauf hät anjefange. Bes zom 6.9. krijje uns Metjleeder zoeesch de beste Plätz, also dot flöck beim Michael Hebbinghaus ungger 68 00 573 oder karten@kguhu.de bestelle, söns setz Ehr hinge. Am Fastelovends-Samsdach fingk et ehschte mol en sujenannte „Üle-Party“ em Forum vun der Jesampschull Holwick statt. Doför woodt de „Boore-Sitzung för Fründe un Frembcher“ jestreche. Dä Jrund es, dat nit mih suvill Kaate verkauf woodte, wie mer et jän jesinn hätte. Dröm hät der Vörstand beschlosse, en Karnevalsparty zo veranstalte, wo nur Fastelovendsmusik jespillt weed un och die ein ov andere Kölsche Musiktrupp optrett. Met Kölsch vum Faaß un Partystimmung för „Ahle, Junge un Jungjeblivvene“ welle mer de Session usklinge looße un uns op de letzten drei „Närrischen Daach“ enstimme. Nevven Stehplätz jitt et och Setzplätz. De Kaate för de „Üle-Party“ koste 15 €. Och neu em Prujramm es en diesem Johr de „Feier zum 11.11.“, am Sonndach dä 7.11.2010 em Autohaus Karst an der Mülheimer Straße 115 en Bergisch Gladbach. Do wääde mer bei Kölsch un leckere Häppche de neue Session enlügge. Kaate jitt et jetz ald för 11.11 €. Em Oktober 2010 fiere uns J'UHU's et 22-jöhrich Bestonn met ner jroße Jubiläumsparty op de „Opernhausterrassen“ av 19 Ohr. Kaate dovör jitt et för 15,- € unger karten@juhu.de. Leev Üle, dat wor et; mer wünsche Üch ne schöne Urlaub, dot Üch jot erholle. Vill Jröß, Üre Vörstand |
